[b]
من مجلة الكواكب
شعر الشاعر الكبير عبد الوهاب محمد يرحمه الله
ياعندليب الشجن والشدو والتطريب
بهدى التحايا وبترحم عليك
ياحبيب وانا بعيش فى وسط فنى عجيب وغريب
فيه كثرت الاغربة بعدك بشكل رهيب
بين كل ناعق وبومة استفردوا بينا
وجعلوا م المغنى اقوى وسائل التعذيب
ودنى ياعبد الحليم اللى انت عارفها
اتشرخت من حناجر صعب تصنيفها
خلى الميدان فابتدت ترمح على كيفها
وتزيف الاغنية ويسترزقوا بزيفها
خلوها سلعةرخبصة ومسخرة وتهريج
وقرفونى انى افكر يوم فى تاليفها
بتذكرك افتكر روح الارتفاع بالذوق
وازاى سمو الغنا لما يمد لفوق
الصدق فى العاطفة نفاذ بينشر ضوء
دلوقتى قالوا الشباب لازمه الخروج م الطوق
وتوهونا فى شبابية عيالية
وماعت المسالة والغاغة ناصبة الجوق
ومغنيينا النهاردة فى التليفزيون
بيجروا خلف البنات ومعليين التون
يتطرطشوا بالوحل ويبصوا ع البلكون
ويغنوا برضه غنا مالهش طعم ولون
حتى اللى فيهم رمق من جملة الطايحين
واحد بيشوى ذرة والثانى واقف جون
سلام عليك فى العلا يااخر الحلوين
اللى مايتعوضوا ابدا يمين ويمين
انت اللى ذكراك بتيجى تكشف الهايفين
وتبين الفرق واضح يدهش السامعين
يكفاك بانه عايش بينا لحد اليوم
والباقى اموات وهمه للاسف عايشين